Rede Scalabriniana
de Comunicação

Vegnesti de onde el pan podea mancare
ma nò na ciesa, un campanile e un prete,
sti imigrati, de Dio con fame e sete,
nel mato imersi, i vivea a invocare

de la fede i conforti e ghe parea
de vivere e morire come béstie..
e i tolerava tute le molestie
ma questa falta no i la soportea.

No ghe gera Ministri del Signore
nei primi tempi de l’imigrassion,
ne chi gavesse tanta istrussion,
ma fede ghe gera e viva con ardore.

Fede e pràtica religiosa le gera
pai nostri vècii una cosa sola:
i ghe credea in Dio e ntela so Parola
e i la pratichea, matina e sera.

I se alsava col segnal dela crose,
um Padre Nostro e na Ave Maria,
un Glòria Patri, e amém cosi sia,
devotamente e sempre soto vose.

E dopo i ndava drio ai so lavori:
molder le vache, ndar tor su i ovi,
controlare i porceleti novi,
arar, piantar, sugandose i sudori.

A mesodì i se fermava: prima,
par recitar el Angelus, e poi,
par andare a magnar risi e fasoi
co’n bel toco de formaio in cima.

E poi la sera, vanti andar in leto,
el Rosàrio i ghe pregheva a la Madona
e dopo el pupà e la so dona
i diseva el “Dio sia benedeto”.

Altre volte, invesse, a memòria,
insieme i disea i Comandamenti
o i preceti de la Ciesa; venti
Requiem ai Morti e per i vivi un Glòria.

Altre sere, le verità dela fede,
le virtù teologai e cardinai,
anca i sete vìssii capitai
e i Novìssimi, par chi non crede...

El gera el modo de passar ai fioi
le grandi Veritá dela Religion.
Pararà par naltri incó esagerasion,
ma alora no la gera come ancoi.

Lésare tanti no i savea, ne scriver;
la Bíblia l’era un libro molto raro
e par le so scarsele molto caro,
par lori che i stentea in princípio a viver.

Alora no ghe gera scole e ciese;
sol pí tardi una a una le ze nasseste
e insieme i catechisti, che, a le feste
 i ’nsegneva dotrina a pròprie spese.

La sede parochial l’era lontana
e’l prete vegneva de quando in quando
parché el teritòrio l’era grando
e’l stava fora parte dela setimana.

De festa a caval qualcun andea a messa;
dopo el racontava la predica in fameia
e i la scoltava sensa bater na seia
come se i la scoltasse in Ciesa stessa.

Ancó, con tanti mètodi e mesi,
tanti de religion no i sà pi gnente.
La colpa zela de chi? Del negligente
o de’n tipo sbalià de catechesi?

Adesso, gràsse a Dio, sta nassendo
un novo modo de catechisar,
un novo modo de Gesù anunsiar,
fede profonda e vita envolvendo...

Ze quel che, per vangélico istinto,
i boni Nostri Vècii i fasea;
Bìblia e liturgia ghe manchea,
ma co’l divino aiuto i ga vinto.

Che vinsa questa nova inissiativa,
che ripercuta la Buona Nova in ogni cuor,
che tuti i gàpia Vita nel Signor,
che el Signor in ogni cuore viva.

Pe. Giovanni Simonetto
Migrante Italiano e Padre Scalabriniano